Jun 25 2019 10:32
Ferah Sabirqizi
Views: 1440
Avropa Şurası Parlament Assambleyasının Miqrasiya, qaçqınlar və məcburi köçkünlər komitəsinin iclası zamanı erməni deputatların təxribatının qarşısı alınıb. Komitədə “Avropada məcburi köçkünlərin humanitar ehtiyacları və hüquqları” adlı 2214 saylı qətnaməsinə dair dinləmələr keçirilib. Azərbaycanın Qaçqınların və Məcburi Köçkünlərin İşləri üzrə Dövlət Komitəsinin sədr müavini Fuad Hüseynov çıxış edib. O, Ermənistanın işğalçılıq siyasəti nəticəsində Azərbaycanın üzləşdiyi qaçqın problemindən danışıb.
 
Lakin Ermənistandan olan deputat Naira Zohrabyan çıxışda səhv rəqəmlər səsləndiyini iddia edib. Əvəzində toplantının sədri ermənistanlı deputatı qəzəblənməməyə, təmkinini qorumağa çağırıb. O həmçinin Naira Zohrabyanı sual-cavab formatına riayət etməyə dəvət edib. Avropada öz ölkələrindən məcburi köçkün düşmüş insanların ehtiyacları və humanitar hüquqlarına dair hesabatın müəllifi Killion Munyama isə erməni deputata cavab olaraq Fuad Hüseynovun təqdim etdiyi rəqəmləri təsdiqləyib. O, Dağlıq Qarabağ və ona bitişik 7 rayondan məcburi köçkün düşmüş insanların sayının 600 min olduğunu bildirib.
 
“Azərbaycanın 20 faiz ərazisi işğal olunub. Avropa Şurasına üzv olanda düşünürdük, bu qurum işğalçı Ermənistana qarşı sanksiyalar qəbul edəcək və etməlidir. Ancaq heç nə olmadı”. Bu fikirləri AŞPA-nın yay sessiyasında "Səlahiyyətlər və səsvermə ilə bağlı Parlament Assambleyasının qərar qəbul etmə prosesinin gücləndirilməsinə" dair müzakirələr zamanı qurumdakı Azərbaycan nümayəndə heyətinin rəhbəri Səməd Seyidov söyləyib. O deyib ki, Avropa Şurası sanksiyalar qəbul etmək əvəzinə, Azərbaycan ilə Ermənistanı çağıraraq müzakirələr aparmağı, bu vəziyyətdən çıxmaq üçün həll yolları tapmağı, danışmağı məsləhət görür.
 
AŞPA-nın yay sessiyasında bu gün azərbaycanlı girovlar Dilqəm Əsgərov və Şahbaz Quliyevlə bağlı dinləmələr təşkil olunub. 
 
 "İki nəfər azərbaycanlı mülki şəxsin humanitar işi: Dilqəm Əsgərov və Şahbaz Quliyev" adlı tədbirdə Azərbaycan Respublikasının AŞ PA-dakı nümayəndə heyətinin dəstəyi ilə baş tutmuş bu tədbirdə AŞ PA üzvləri, diplomatik korpus, Avropa Şurası katibliyi, vətəndaş cəmiyyəti, mətbuat və yerli ictimaiyyət nümayəndələri iştirak ediblər.
 
Trend-in məlumatına görə, giriş sözü ilə çıxış etmiş Azərbaycanın AŞ PA-da nümayəndə heyətinin rəhbəri Səməd Seyidov Azərbaycanlı girovların məsələsini ötən 5 il ərzində istər AŞ PA-da, istərsə də digər beynəlxalq təşkilatlar çərçivəsində qaldırdıqları barədə məlumat verib. O, əlaqədar təşkilatların doğru yanaşma sərgiləmədiklərini və ikili standartlardan çıxış etdiklərini qeyd edib. Səməd Seyidov AŞ PA çərçivəsində yazılı bəyanat yayacaqlarını bildirərək, insan hüquqları və demokratik dəyərlərə hörmətlə yanaşan hər bir deputatı bu yazılı bəyanata qoşulmağa dəvət edib.
 
Tədbirə moderatorluq edən Azərbaycanın AŞ PA-da nümayəndə heyətinin üzvü Ülviyyə Ağayeva tədbir və onun təşkil edilməsində əsas məqsəd barədə söz açaraq, işğal edilmiş Azərbaycan torpaqlarında valideyn və qohumlarının qəbirlərini ziyarət edərkən, girov götürülmüş Dilqəm Əsgərov və Şahbaz Quliyevin acı taleyinə diqqət çəkib və humanist məqsədlərlə onların pozulmuş hüquqlarının bərpasına nail olmağın vacibliyini bildirib.
 
Azərbaycan Respublikası Qaçqınların və Məcburi Köçkünlərin işləri üzrə Dövlət Komitəsi sədrinin müavini Fuad Hüseynov çıxışında Ermənistan-Azərbaycan Dağlıq Qarabağ münasiqəsinin acı nəticələri, o cümlədən Dilqəm Əsgərov və Şahbaz Quliyev də daxil olmaqla bir milyondan artıq soydaşımızın qaçqın və məcburi köçkünə çevrilməsindən danışıb. Bu qrup insanların sosial vəziyyəti və mənzil şəraitinin yaxşılaşdırılması istiqamətində Azərbaycan hökuməti tərəfindən görülmüş geniş miqyaslı işlər barədə məlumat verib. O, Azərbaycanlı köçkünlərin öz dədə-baba yurdlarına qayıtmaq arzusunu vurğulamaqla, beynəlxalq ictimaiyyəti, o cümlədən AŞ PA-nı soydaşlarımızın pozulmuş hüquqlarının bərpası istiqamətində təsirli addımlar atmağa çağırıb.
 
İnsan Hüquqları üzrə Avropa Məhkəməsi yanında Azərbaycanın səlahiyyətli nümayəndəsi Çingiz Əsgərov məsələnin hüquqi tərəflərinə aydınlıq gətirərək, azərbaycanlı mülki şəxslərin İnsan Hüquqları üzrə Avropa Konvensiyası ilə qorunan bütün hüquqlarının pozulduğunu bəyan edib. Girovluqdan öncə və sonra çəkilmiş şəkillərinin Dilqəm Əsgərov və Şahbaz Quliyevin ermənilər tərəfindən qeyri-insani rəftar və işgəncələrə məruz qoyulduqlarını açıqlığı ilə göstərdiyini qeyd edən Ç.Əsgərov müvafiq beynəlxalq təşkilatlar, o cümlədən Avropa Şurası institularının adekvat reaksiya verməməsinin dərin narahatlıq doğurduğunu ifadə edib. O həmçinin Azərbaycan tərəfinin "hamının hamıya" prinsipi əsasında bütün girovların dəyişdirilməsi təklifinin Ermənistan tərəfindən qəbul edilməməsini iştirakçıların diqqətinə çatdırıb.
 
Azərbaycanda fəaliyyət göstərən Beynəlxalq Dialoq və İnkişaf Alyansının (IDDA) rəhbəri Nüşabə Məmmədova təmsil etdiyi qurum, xüsusilə erməni girovluğunda saxlanılan Dilqəm Əsgərov və Şahbaz Quliyevin işi ilə bağlı görülmüş işlər barədə məlumat verib. O, bu günahsız insanların səhhətində ciddi problemlər yarandığına diqqət çəkərək, beynəlxalq ictimaiyyəti onların acı taleyinə biganə qalmamağa çağırıb.
 
Tədbirdə həmçinin Dilqəm Əsgərovun oğlu Kürdoğlu Əsgərov çıxış edib. O, İnsan Hüquqları üzrə Avropa Məhkəməsinə müraciət ünvanladıqları, lakin prosesin artıq bir neçə ildir uzandığını bildirib. K.Əsgərov atasının səhhətində girovluqda olduğu müddətdə yaranmış kəskin problemlərin onun ailəsində ciddi narahatlıq doğurduğunu qeyd edərək, Avropa Məhkəməsini təcili şəkildə ədalətli qərar çıxarmağa çağırıb. O, eyni zamanda atasından artıq 1 il 8 aydır xəbər almadıqlarını açıqlayaraq, beynəlxalq ictiamiyyəti atasının azad edilməsi üçün təcili tədbirlər görməyə səsləyib.
 
Tədbirdə, eləcə də Ermənistan-Azərbaycan Dağlıq Qarabağ münaqişəsi və onun nəticələrindən bəhs edən video-çarx nümayiş etdirilib və iştirakçılarla fikir mübadiləsi aparılıb.
 
Toplantıya yekun vuran Səməd Seyidov təşkilatın təsis edilməsinin 70 illiyinin qeyd edildiyi bir vaxtda Avropa Şurası məkanında girov götürmüş mülki şəxslərin vəziyyətindən danışmağın təəssüf doğurduğunu bildirib. O, Azərbaycanlı girovların azad olunması üçün bütün səylərin səfərbər olunmasına dair çağırış edib.
 
Yazı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyilə həyata keçirilən “Ermənistanın işğalçılıq siyasəti nəticəsində yaranmış regional təhlükəsizlik barədə beynəlxalq ictimaiyyətin məlumatlandırılması” layihəsi çərçivəsində təqdim olunur. 

Create Account



Log In Your Account