May 19 2020 12:39
Elshad Aliyev
Views: 39

İranın Mazandaran vilayətindən 200 milyon dollarlıq sitrus meyvə Azərbaycan üzərindən Rusiya və digər ölkələrə ixrac edilib. AZƏRTAC xəbər verir ki, bu sözləri vilayətin İqtisadiyyat idarəsinin rəhbəri Mehdi Qəlibçi deyib. O bildirib ki, 111 milyon dollarlıq 158 min ton kivi ixrac olunub.

Qeyd edək ki, İranla Azərbaycanın nəqliyyat sahəsində əməkdaşlığı tərəflər üçün səmərəlidir. İran ixrac məhsullarını avtomobil və dəmir yolları vasitəsilə Azərbaycan üzərindən ixrac edir. Azərbaycanın tranzit potensialı İranla Rusiya arasında idxal-ixrac əməliyyatlarının həyata keçirilməsi üçün əlverişli şərait yaradıb. İranın Mazandaran, Gilan, Gülüstan və Ərdəbil vilayətləri ölkəmizlə sərhəd regionunda yerləşir. Sitrus meyvələrdən başqa bu vilayətlər digər kənd təsərrüfatı məhsulları və tikinti materialları ixrac etmək imkanına malikdir.

Azərbaycanın Astara(Azərbaycan)-Astara(İran) dəmir yolu xəttini və Ələt-Astara avtomobil yolunu yenidən quraraq istismara verməsi İranın adı yuxarıda göstərilən vilayətlərinin ixrac imkanlarını artırıb.

Nəzərə almaq lazımdır ki, Rusiya da Azərbaycan ərazisindən tranzit kimi istifadə edərək İranla ticarət əlaqələrini daha da genişləndirib. Bildiyimiz kimi, hələ Sovet İttifaqı dövründən Azərbaycanla Rusiya arasında geniş dəmir yolu əlaqəsi mövcuddur. Bu gün isə Rusiya Astara(Azərbaycan)-Astara(İran) dəmir yolu ilə İrana taxıl, tikinti materialları və digər texniki vasitələr ixrac edir. Rusiyanın Dağıstan Respublikası da Azərbaycan ərazisindən istifadə etməklə İranla ticarət əlaqələrini davam etdirir. Yüklər Dağıstandan qatarla birbaşa İran Astarasına daşınır.

Qeyd edək ki, “Şimal-Cənub” Beynəlxalq Nəqliyyat Dəhlizinin əsas seqmentindən olan Qəzvin-Rəşt-Astara(İran)-Astara(Azərbaycan) dəmir yolu xətti istifadəyə verildikdən sonra nəinki Rusiya, eləcə də Avropa dövlətləri də Azərbaycandan tranzit kimi istifadə edərək İranla ticarət əlaqələrini inkişaf etdirəcək. İstər Avropadan İrana, istərsə də əks istiqamətə yüklərin daşınması Azərbaycanın dövlət büdcəsinin gəlirlərinin artmasına səbəb olacaq.

Hələlik bu dəmir yolunun Qəzvin-Rəşt hissəsi hazırdır. Rəşt-Astara hissəsində isə inşaat işləri davam edir. Cənub-Şərqi Asiya ölkələrindən Avropa və Rusiyaya daşınan yüklər İranın dəniz limanlarına, buradan isə Qəzvin-Rəşt-Astara(İran)-Astara(Azərbaycan) dəmir yolu ilə Avropaya daşınacaq.


Create Account



Log In Your Account