Jan 29 2018 12:38
Naile Hesenova
Views: 347

Beynəlxalq Muğam Mərkəzində məşhur blüz və caz pianoçusu Silvan Zinggin ifasında “Boogie Woogie” musiqi janrında konsert təqdim edilib. Konsert Beynəlxalq Muğam Mərkəzi və İsveçrə səfirliyinin birgə təşkilatçılığı ilə keçirilib.

Muğam Mərkəzindən AZƏRTAC-a bildirilib ki, konsertdən öncə İsveçrənin Azərbaycandakı səfiri Filip Ştalder tanınmış isveçrəli pianoçu Silvan Zingg haqqında geniş məlumat verib.

Diplomat bildirdi ki, ifaçının Bakıda konsertlə çıxış etmək seçimi təsadüfi olmayıb. Ötən il Bakıda keçirilən ənənəvi Beynəlxalq Caz Festivalında klassik musiqi ilə cazı bir-biri ilə uyğunlaşdırmağı bacaran isveçrəli musiqi qrupu Mats-up çıxış edib. Bu çıxışdan sonra “Boogie Woogie” üslubunda ifa edən isveçrəli musiqiçinin konsertini təşkil etmək qərarına gəldik.

Daha sonra Silvan Zingg Azərbaycanda olmasından məmnunluğunu ifadə edərək deyib: “Bakı gözəldir, çox xoşuma gəldi. Sizin musiqiniz, xüsusilə muğam və onun cazla sintezi qeyri-adidir”.

İfaçı gecədə caz blüz və “Boogie Woogie” üslubunda musiqilər səsləndirib.

Qeyd edək ki, pianoda ifa etməyə uşaq yaşlarından başlayan Silvan Zingg bu günə qədər İsveç, Almaniya, Lixtenşteyn, Avstriya, Fransa, İtaliya, Hollandiya, Belçika, İspaniya, İngiltərə, ABŞ, Kanada, Hindistan, Ərəb Əmirlikləri, Çin, Rusiya, Meksika və digər xarici ölkələrdə konsert proqramları ilə çıxış edib. İfaçı bir çox məşhurlarla eyni səhnəni bölüşüb. Tənqidçilər ifaçının texnikasından təsirlənərək, onu qeyri-adi pianoçu kimi təqdim edirlər. Onun ən böyük hiti olan "Dancing The Boogie" musiqi nömrəsi Youtube-da 8 milyondan çox izləyici toplayıb. Onun bu növ musiqi janrına olan marağı 2002-ci ildə İsveçrədə indi də çox uğurla davam edən Luqano Beynəlxalq “Boogie Woogie” Festivalını təsis etməsinə səbəb olub.

 


Create Account



Log In Your Account