Dec 23 2019 13:04
Elshad Aliyev
Views: 101

SOCAR platformadan dənizə axıdılan neft və ya digər bulanıq maye ilə bağlı görüntülərə münasibət bildirib.

SOCAR-dan AZƏRTAC-a bildirilib ki, son saatlarda sosial şəbəkələrdə dəniz platformasından neft və ya digər bulanıq mayenin dənizə axıdılması görüntüləri yayılmaqdadır. Nə neft, nə lay suları, nə də digər çirkli maddələrin dənizə birbaşa axıdılması SOCAR-ın təlimat və standartlarında nəzərdə tutulmur və şirkətin rəhbərliyinin yerlərə verdiyi təlimatlara birbaşa ziddir. SOCAR son dövrdə “Azneft” İstehsalat Birliyinin dəniz platformalarında lay sularının təmizlənməsi üçün xüsusi avadanlıqlar quraşdırıb və artıq neftlə birlikdə çıxan lay sularının da təmizlənməsinə tam nail olunub və bu cəhətdən Azərbaycanın milli brendi SOCAR bir çox digər şirkətlərdən irəlidədir.

“Yayılan görüntülərdə əks olunan hadisənin məkanı Neft Daşlarında ehtimal olunduğuna görə, bu gün səhər saatlarında “Azneft” İB-nin rəhbər heyətinin iştirakı ilə oraya komissiya göndərilib. Hazırda araşdırma aparılır və nəticəsi barədə ictimaiyyət məlumatlandırılacaq. Ətraf mühitin qorunması istiqamətində bu cür hadisələrin təkrar baş verməməsi üçün nəzarət daha da gücləndiriləcək.

Dəyərli ictimaiyyətimizə də bu ortaq hədəfdə biz Azərbaycan neftçilərinə daim dəstək olduğuna görə təşəkkür edirik”, - deyə şirkətin məlumatında bildirilir.

 


Create Account



Log In Your Account