SARA TAĞIYEVANIN 120 İLLİK YUBİLEYİ KEÇİRİLİB

Milli Azərbaycan Tarixi Muzeyində görkəmli xeyriyyəçi Hacı Zeynalabdin Tağıyevin qızı Sara xanım Tağıyevanın anadan olmasının 120 illiyinə həsr olunmuş xatirə tədbiri keçirilib. Sara xanımın keçdiyi həyat yolu, çəkdiyi məhrumiyyətlər haqqında danışılıb, muzeyin fondlarında ona aid qorunan zəngin sənədli materiallar nümayiş olunub. 1899-cu ildə, may ayının 20-də atasının mülkündə, muzeyin indiki binasında anadan olan Sara xanım sovet  hakimiyyətinə qədər burda yaşayıb, burdan da son mənzilə yola salınıb. Sovet hakimiyyətinin ilk dövrlərindən etibarən Azərbaycanda  sahibkarlara qarşı başlayan təqiblər  Hacı Zeynalabdin Tağıyevdən də yan keçməyib. Bu qadağalara baxmayaraq, totalitar rejim  dövründə Sara Tağıyeva həyatının böyük hissəsini  atasının  xeyriyəçilik əməllərinin tanıdılmasına həsr edib. Sara xanım atasının Azərbaycanın milli, mədəni inkişafındakı rolunu üzə çıxartmaq istəyirdi.

“Kaspi” qəzetinin təsisçisi Sona Vəliyeva bildirib ki, ki,  XIX əsrin sonunda rusdilli “Kaspi” qəzetinin milliləşməsində H.Z.Tağıyevin böyük rolu olub. Sara Tağıyevanın atasının xidmətlərini ortaya çıxarması üçün çalışdığını qeyd edən Sona Vəliyeva onun bədii obrazının yaradılmasının vacibliyini vurğulayıb.

Qeyd olundu ki, Sara xanımın bu fəaliyyətini, H.Z.Tağıyevin mirasını Azərbaycan xalqı heç vaxt unutmayacaq. Bildirildi ki, Sara xanım ana, ailəsinin xanımı olmasına baxmayaraq öz atasının adının təmizlənməsi uğrunda sonuna qədər mübarizə aparıb.

Çıxış edənlər Sara xanımla bağlı xatirələrini, onun öz  atasının adını təmizləmək üçün göstərdiyi xidmətlərdən danışıblar.